Suleqateqarnissamut piumasaqaatit

Sullitarlu allakkatigut allatut isumaqatigiissuteqartoqarsimanngippat, eqqartuussisuserisutut suliassanut tamanut Advokatfirmaet Meinelip sullitaminut suliarisaanut suleqatigiinnermi atugassarititaasut atuutsinneqarput.

Advokatfirmaet Meinelip sullitaq suleqatigalugu suliassaq sullitamut nassuiaatigissavaa. Suliassaq ataaseq sullitamut ataatsimut arlaqartunulluunniit eqqartuusserisutut suliassamut ataatsimut arlaqartunulluunniit tunngasuusinnaavoq. Tamatumunnga atatillugu eqqartuusisuserisoqarfiup sulianik sunik suliaqarnissaa, suleqatit kikkut sulisullu allat suliamut attuumassuteqartitaassanersut takuneqarsinnaassaaq.

Suliap qanoq ittuunera qanorlu annertutiginera, suliamut atasumik akisussaaffiup qanoq ittuunera, suliami pineqartup annertussusaa, suliap sullitamut pingaarutaa, piffissaq atorneqartoq kiisalu inerneratut anguneqartoq aallaavigalugit akissarsiassat aalajangersarneqassapput. Suliffiup akissarsiassai qulakkeerniarlugit qularnaveeqqusiissummik akiliisoqarnissaa Advokatfirmaet Meinel-ip piumasaqaatigissaneraa suliamiit suliamut nalilersorneqartassaaq. Taamatut pisoqassappat qularnaveeqqusissut sullitap kontoanut akilerneqassaaq. Moms ilanngunneqarneq ajorpoq.

Piffissap ingerlanerani akuttunngitsukkuutaamik, sullitamut isumaqatigiissutigineqartumik akiliuteqartitsisarpugut. Allaavigineqarpoq ataavartumik akiliuteqartarnerit, qaammatit pingasukkaarlugit.

Akiligassiissutip ullulerneqarneraniit ullut 14-t qaangiutsinnagit akiligassiissutip tamarmiusup akilerneqarnissaa piumasaqaataavoq. Kingusinnerusukkut akiliisoqartillugu erniat pillugit inatsimmi aalajangersakkat naapertorlugit ernianik ilanngussisoqassaaq.

Akissarsiat saniatigut aningaasartuutit akiliutaagallartullu, suliap suliarineranut atatillugu aningaasartuutigisimasavut, sullitap akilissavai, taakku assersuutigalugu tassaasinnaapput eqqartuussivinnut akitsuutit akiliutillu, angalanermut najugaqarnermullu aningaasartuutit kiisalu assilisitsinernut nassiussinernullu aningaasartuutit aalajangersimasut. Aningaasat akilerneqarallarnissaannut, imaluunniit aningaasut siumut akilerneqarnissaasa qinnutiginissaannut aningaasat qanoq amerlatiginerat sullitamullu attuumassutit qanoq ittuunerat apeqqutaapput.

Eqqartuussisaaseq pillugu inatsimmi eqqartiissisuserisut pillugit malittarisassani pissusilersornissamut ileqqorissaarnissamullu piumasaqaatit naapertorlugit kiisalu eqqartuussisuserisut ileqqorissaarnissaat pillugu Advokatrådip malittarisassai naapertorlugit Advokatfirmaet Meinel-ip, aamma suliffeqarfiup suleqatigisaata sulisuisalu suliaq suliarissavaat.

Pissutsit aallaavigalugit paasissutissaq pineqartoq isertuussassaanngippat, suliffeqarfiup suliassaataasa imarisai qanoq ittuunerilu eqqarsaatigalugit aamma sullitamit sullitarlu pillugu paasissutissat eqqarsaatigalugit, Advokatfirmaet Meinel-imi sulisut tamarmik susassaqanngitsunut tunngatillugu nipangiussisussaatitaapput. Atortussat mianernartut isertuussassallu qulakkeerneqarnissaannut isumannaallisaanikkut immikkut ittumik suleriaaseq pilersipparput.

Suliaq naammassereerpat sullitap uppernarsaatit pigisai assilisaanngitsut sullitamut nassiunneqassapput. Suliaq naammassereerpat uppernarsaatit suliamut tunngasut ukiuni 5-ni toqqorsimaneqassapput. Sullitap aningaasaatai tamarmik Advokatsamfundip malittarisassat naapertorlugit aqunneqassapput, sullitap kontoanut ikineqarlutik. Advokatsamfundip malittarisassai naapertorlugit erniat sullitap kontoanut ikineqartut sullitap pisassarai.

Suliffeqarfiup sullitaasa akornanni soqutigisanik aaqqiagiinngilersitsisunik sulianik tigusineq ajorpugut. Sullitamut suliassaq akueritinnagu sullitareriikkatta soqutigisaannik aaqqiagiinngissutaasinnaasoqarnera mississoqqaartarparput. Aaqqiagiinngissuteqartoqassappat, sullitaq eqqartuussisuserisumut allamut innersuuttarparput.

Advokatfirmaet Meinel inatsisitigut pisussaaffiusumik akisussaassutsimut sillimmasigaavoq sillimmasiisaarfimmi akuerisaasumi, siunnersuinitsinnut sillimmasiissutaasumik. Aningaasat matussutissat inatsisit naapertorlugit minnerpaaffissaannit aningaasat sillimmasiissutaasut annertusisaapput. Sullitat tamatuminnga soqutigisaqartut apeqquteqarnermikkut aningaasat sillimmasiissutaasut atuuttut paasiniarsinnaavaat. Eqqartuussisuserisutut suliffeqarfiup akisussaassusermik annerusumik tigusinissaa sullitap kissaatigissappagu, sillimmasiinikkut matussutissaq pissusiviusutigut qaffanneqarsinnaavoq.

Akisussaaffiup killilernera tulliuttoq atuuppoq: Akisussaaffik toqqaannanngitsumik annaasanut tunngasuunngilaq, ingerlatsinermi annaasanut, piffissamut annaasamut, iluanaarutinut annaasanut, paasissutissanut annaasanut, tutsuvigineqarneqarunnaarnermut isiginerlugaalernermullu tunngasuunani. Akisussaaffik akiliisitsinernut assigisaannulluunniit tunngasuunngilaq, akiliisitsissutit pisortanut namminersortunulluunniit tunniunneqartussaagaluarpata (“punitive damages”). Sullitamik isumaqatigiissuteqarnitsigut siunnersortinut allanut suliassap ilaanik suliarinnittussanut, imaluunniit siunnersortinut uagut innersuussinerput naapertorlugu sullitap sullissisinngortissimasaanut pisussaaffinnut akisussaaffik tunngasuunngilaq. Ajoqusiinerup ataatsip kingunerisaanut taarsiissutissatut aningaasat tamarmiusut, sillimmasiissutip annerpaaffissaanit amerlanerusinnaanngillat. Iliuuserisamit akisussaassusiliisumit ataatsimit ingerlatiinnarneqartumit uteqqianneqartumilluunniit aallaaveqartumik piumasaqaatit tamarmik ajoqusiinerup ataatsip kingunerisut isigineqarput, aamma inuk ataaseq inuilluunniit arlaqartut uagut akisussaaffigisavut namminneq akisussaaffimmik tigusisimagaluarpata, aamma iliuuseqarneq pissutigalugu innarligaasoq ataaseq arlaqartulluunniit piumasaqaateqarsinnaagaluarpata.

Eqqartuussisuserisoqarfiup suliamut atatillugu allakkiat aalajangersimasut suliarisai sullitap atorsinnaavai, kisiannili atortunut taakkununnga atatillugu pilersitseqqaartutut piginnittuussutsit allatigullu tigussaanngitsunut piginnittuussutsit Advokatfirmaet Meinel-ip pigivai pigiinnassallugillu.

Advokatfirmaet Meinel-ip Advokatsamfundet aamma Kalaallit Nunaanni Eqqartuussisuserisut Peqatigiiffiat ilaasortaaffigai.